Bu gün gənclərimizin intellektual və yaradıcı potensialının üzə çıxarılması və ümummilli məsələlərə yönəldilməsi, xüsusilə regionlarda yaşayan gənclərin fəallığının artırılması istiqamətində dövlətimiz tərəfindən məqsədyönlü iş aparılır. Respublikamızın bölgələrində, o cümlədən Lənkəranda yaradılacaq Gənclər Mərkəzi də bu xoşməramlı məqsədə xidmət edəcəkdir.

Yeni yaradılacaq Gənclər Mərkəzinin ümumi sahəsi bir hektar, tikinti sahəsi isə 1400 kvadratmetrdir. Üçmərtəbəli binada gənclərin asudə vaxtlarını səmərəli keçirmələri üçün hər cür şərait yaradılacaqdır. Mərkəzin birinci mərtəbəsində kafe – diskoteka, tir və sinema zalları fəaliyyət göstərəcəkdir. Burada, həmçinin inzibati otaq yaradılacaqdır. Binanın ikinci mərtəbəsində konfrans, kompyuter və oxu zalları, yaradıcı otaq yerləşəcəkdir. Mərkəzin üçüncü mərtəbəsi Çay evi kimi fəaliyyət göstərəcəkdir.

Xatırladaq ki, Azərbaycan Respublikasının Prezidenti İlham Əliyev iyulun 31-də Lənkəran şəhərinin mərkəzində inşa olunacaq Gənclər Mərkəzinin təməlqoyma mərasimində iştirak etmişdi.

"Xalq qəzeti"