“Xalq qəzeti”nin məlumatına görə, “Yerli İcra Hakimiyyətləri haqqında” Əsasnaməyə uyğun olaraq Lənkəranın inzibati ərazi dairələrində 2012-ci ilin yekunlarına həsr olunmuş hesabat yığıncaqlarına start verilmişdir. İlk hesabat yığıncağı yanvarın 11-də Kərgəlan kəndində keçirilmişdir.

Hesabat yığıncağında çıxış edən Lənkəran ŞİH-nin başçısı Taleh Qaraşov 2012-ci ildə Azərbaycanın  bütün sahələrində qazanılmış uğurlardan, yeniliklərdən və nailiyyətlərdən söz açaraq bildirmişdir ki, Azərbaycan iqtisadi qüdrətini artıran bir ölkəyə çevrilmiş, onun beynəlxalq nüfuzu xeyli artmışdır.

İcra başçısı daha sonra Prezident İlham Əliyevin gündəlik diqqət və qayğısı sayəsində Lənkəranda aparılmış genişmiqyaslı tikinti, yenidənqurma və abadlıq işləri barədə də çıxış etmiş, 2013-cü ildə qarşıda mühüm vəzifələrin durduğunu qeyd etmiş, qəsəbə və kəndlərin qazlaşdırılmasının sürətləndiriləcəyini, yol infrastrukturunun, rayonun su-kanalizasiya sisteminin yenilənəcəyini, yeni məktəb binalarının, səhiyyə ocaqlarının istifadəyə veriləcəyini vurğulamışdır.