Azərbaycan Respublikasının Rabitə və İnformasiya Nazirliyindən aldığımız məlumatda bildirilir ki,Trans-Asiya-Avropa (TAE) fiber-optik kabel magistralı layihəsində sədrliyin 2013-2015-ci illər üçün Ukraynadan Azərbaycana keçməsini rəsmən təsdiqləyən protokol imzalanmışdır.

İştirakçı dövlətlər Azərbaycanın layihədə sədrliyini dəstəklədiklərini bildirmişlər. Azərbaycan tərəfi qloballaşma və daim artan tələblər nəzərə alınmaqla TAE-nin səmərəliliyinin gələcəkdə artırılması üçün çalışacağını bəyan etmişdir.

 Qeyd edək ki, Azərbaycanın TAE-də sədrlik məsələsi layihənin idarə edilməsi üzrə komissiyanın ötən ilin noyabrın 7-8-də Bakıda keçirilən 21-ci iclasında müzakirə olunmuşdur.

“Xalq qəzeti”