“Azərbaycan Dəmir Yolları” Qapalı Səhmdar Cəmiyyətinin Sərnişin daşımaları Departamentinin kollektivi qarşıdan gələn 31 dekabr - Dünya Azərbaycanlılarının Həmrəyliyi günü və Yeni illə əlaqədar gücləndirilmiş iş rejiminə keçəcək. 

“Azərbaycan Dəmir Yolları” Qapalı Səhmdar Cəmiyyətinin mətbuat katibliyinin rəisi Nadir Əzməmmədovdan aldığımız məlumata görə, Yeni il ərəfəsində sərnişin sıxlığını nəzərə alıb  752/751 saylı Bakı-Tbilisi-Bakı turist qatarı xəttə buraxılacaq.

Qatar 28 dekabr 2012-ci ildə saat 19.30-da Bakıdan yola düşəcək, 29 dekabr 2012-ci ildə saat 10.15-də Tbilisiyə çatacaq.

Qatar 2 yanvar 2013-cü ildə saat 21.10-da Tbilisidən yola düşəcək, 3 yanvar 2013-cü ildə 12.30-da Bakıya çatacaq.

Sərnişin sıxlığını qismən də olsa aradan qaldırmaq üçün Sərnişin daşımaları Departamentinin kollektivi ölkə daxilində hərəkət edən sərnişin qatarlarına hər gün 10-15, bəzən də 20-30 ədəd əlavə vaqon qoşulmasını təmin edəcək. 

“Xalq qəzeti”