Noyabrın 30-da Azərbaycan hökumətinin tapşırığı ilə Azərbaycanın Serbiyadakı səfirliyi Belqrad şəhərindəki Ana və Uşaq Evinə humanitar yardım göstərmişdir.

Azərbaycanın Serbiyadakı səfirliyindən AzərTAc-a daxil olmuş məlumatda bildirilir ki, bu tədbir Ana və Uşaq Evinə Azərbaycan tərəfindən göstərilən ilk humanitar yardım aksiyası deyildir. Azərbaycan səfirliyi Ana və Uşaq Evini daim diqqət mərkəzində saxlayır. Son yardım isə uşaq mebel dəstləri, hədiyyələr, oyuncaqlar və s. olmuşdur.

Tədbirdə Ana və Uşaq Evinin əməkdaşları, Belqrad Meriyasının və Serbiya ictimaiyyətinin nümayəndələri, Azərbaycanın Serbiyadakı səfiri Eldar Həsənov başda olmaqla səfirliyin əməkdaşları, Belqraddakı Azərbaycan Mədəniyyət Mərkəzi və Serbiya-Azərbaycan Ticari-İqtisadi Palatasının üzvləri və Serbiyadakı Azərbaycan icmasının nümayəndələri iştirak etmişlər.