Naxçıvanda sosial müdafiəyə ehtiyacı olan insanların fərdi evlərlə təmin edilməsi istiqamətində həyata keçirilən tədbirlər davam etdirilir.

Bu il Sədərək rayonunun Qaraağac kəndində hərbi xidmət zamanı sağlamlığını itirmiş ikinci qrup əlil Yavər İsmayılovun ailəsi üçün fərdi yaşayış evi inşa edilmişdir. Naxçıvan Muxtar Respublikası Ali Məclisinin sədri Vasif Talıbov Vətən qarşısında göstərdiyi xidmətə görə Yavər İsmayılova təşəkkür etmiş, ona yeni evin orderini təqdim etmişdir. V.Talıbov ona və ailə üzvlərinə yeni mənzildə xoş günlər və firavan həyat arzulamışdır.

Yavər İsmayılov yaradılan şəraitə və göstərilən yüksək dövlət qayğısına görə ailə üzvləri adından minnətdarlığını bildirmişdir.

Lazımi kommunal şərait yaradılmış üç otaqdan və mətbəxdən ibarət yeni ev mebel dəstləri və digər məişət avadanlığı ilə təmin olunmuşdur. Evin həyəti abadlaşdırılmış, içməli su xətti çəkilmişdir.

AzərTAc