Kollektiv Təhlükəsizlik Müqaviləsi Təşkilatının baş katibi Nikolay Bordyuja təşkilatın Dağlıq Qarabağ münaqişəsinə müdaxilə etməsini doğru hesab etmir. APA-nın xəbərinə görə, N. Bordyuja "Novıye İzvestiya" qəzetinə müsahibəsində bildirib ki, Dağlıq Qarabağ məsələsi ilə bağlı bir neçə institut, o cümlədən ATƏT-in Minsk Qrupu işləyir: "Buna görə də hesab edirik ki, KTMT-nin bu münaqişəyə müdaxiləsi doğru deyil və məhsuldar olmayacaq".
N.Bordyuja deyib ki, Ermənistan Milli Təhlükəsizlik Şurası ilə KTMT Katibliyi arasındakı sıx əlaqə nəticəsində Ermənistanda Rusiya ilə birgə müdafiə sənayesi sahəsinə aid şirkətlər, silah və hərbi texnikanın təmiri ilə bağlı servis mərkəzləri yaradılır. O cümlədən, Ermənistanda KTMT Məlumat Mərkəzi fəaliyyət göstərir.