Xarici işlər naziri Elmar Məmmədyarov noyabrın 27-də AŞPA-nın Monitorinq Komitəsinin həmməruzəçiləri Pedro Aqramunt Font de Mora və Cozef Debono Qrex ilə görüşmüşdür.
Xarici İşlər Nazirliyinin mətbuat xidmətindən bildirmişlər ki, görüşdə Ermənistan-Azərbaycan, Dağlıq Qarabağ münaqişəsinin həlli yolları ətrafında fikir mübadiləsi aparılmış və bu problemin həll olunmamasının regionun gələcəyinə ciddi maneə törətdiyi bildirilmişdir.
Nazir Elmar Məmmədyarov Ermənistan tərəfindən azərbaycanlılara qarşı etnik təmizləmə siyasətinin həyata keçirildiyini, eyni zamanda, Ermənistan-Azərbaycan, Dağlıq Qarabağ münaqişəsinin həlli üçün işğalçı ölkənin danışıqlar prosesindən yayındığını həmməruzəçilərin diqqətinə çatdırmışdır.
Həmməruzəçilər Azərbaycanın narahatlığını başa düşdüklərini və Dağlıq Qarabağ məsələsinin onların hazırlayacağı hesabata daxil ediləcəyini qeyd etmişlər.
Nazir Elmar Məmmədyarov, həmçinin Xocalı hava limanının fəaliyyətinin və uçuşların qeyri-qanuni olduğunu bildirmiş və bunun sülh prosesinə zərbə vurduğunu xüsusi vurğulamışdır.

AzərTAc