Noyabrın 22-də Azərbaycan Respublikasının Baş naziri Artur Rasizadə Asiya Siyasi Partiyalarının Beynəlxalq Konfransının (İCAPP) VII Baş Assambleyasında iştirak etmək üçün ölkəmizdə səfərdə olan Sudan nümayəndə heyəti ilə görüşmüşdür.
Görüşdə Azərbaycan ilə Sudan arasında siyasi, iqtisadi, mədəni sahələrdə əlaqələrin inkişaf etdirilməsi ilə bağlı məsələlər ətrafında fikir mübadiləsi aparılmışdır. Sudanın beynəlxalq təşkilatlarda Azərbaycanın mövqeyini dəstəkləməsi yüksək qiymətləndirilmişdir.
Görüşdə, həmçinin Ermənistan-Azərbaycan, Dağlıq Qarabağ münaqişəsi ilə bağlı sudanlı qonaqlara ətraflı məlumat verilmişdir. Bildirilmişdir ki, Ermənistanın Azərbaycana hərbi təcavüzü nəticəsində torpaqlarımızın 20 faizi işğal olunmuş, 1 milyondan çox vətəndaşımız etnik təmizləmə siyasətinə məruz qalmışdır. Azərbaycanın bu problemin beynəlxalq hüququn norma və prinsipləri əsasında həllinə tərəfdar olduğu diqqətə çatdırılmışdır.
Sudanlı qonaqlar Azərbaycana səfərlərindən, ölkəmizdə müşahidə etdikləri inkişaf dinamikasından məmnun qaldıqlarını bildirmiş, Bakının Asiya Siyasi Partiyalarının Beynəlxalq Konfransının VII Baş Assambleyasına ev sahibliyi etməsinin önəmini vurğulamışlar.