Gədəbəy Rayon Məhkəməsinin yeni inzibati binası istifadəyə verilmişdir. Ədliyyə naziri, Məhkəmə-Hüquq Şurasının sədri Fikrət Məmmədov, Ali Məhkəmənin sədri Ramiz Rzayev, Gədəbəy Rayon İcra Hakimiyyətinin başçısı Ramiz Yediyarov və ictimaiyyət nümayəndələri ümummilli lider Heydər Əliyevin abidəsi önünə gül dəstələri qoymuş, ulu öndərin xatirəsini ehtiramla yad etmişlər. 
Sonra yeni binanın açılışı olmuşdur. Mərasimdə bildirilmişdir ki, 1770 kvadratmetr sahəsi olan və inşasına 2010-cu ildən başlanılan inzibati binada vətəndaşların müraciət imkanlarının asanlaşdırılması, şəffaf xidmətin təmin edilməsi məqsədilə ən son rabitə və informasiya texnologiyaları tətbiq edilmişdir. Məhkəmə zallarında proseslərin daha dəqiq və sürətlə sənədləşdirilməsinə xidmət edən "Femida" sistemi yaradılmışdır.
Sonra ədliyyə naziri Fikrət Məmmədov çıxış edərək ölkə başçısının tapşırıq və tövsiyələri ilə həyata keçirilən məhkəmə-hüquq islahatlarından və bu islahatlar nəticəsində qazanılan uğurlardan danışmışdır. Ən müasir standartlara uyğun inşa edilmiş yeni məhkəmə binasında vətəndaşlara göstərilən xidmətin səviyyəsinin yüksəldilməsi üçün tövsiyələrini vermişdir.
Sonra yeni məhkəmə binasına baxış keçirilmişdir.

AzərTAc