Azərbaycan İslam Əməkdaşlıq Təşkilatı Nazirlər Şurasının Xocalı faciəsini soyqırımı kimi tanımasını alqışlayır. Bu sözləri "Rabitə dünyası" qəzetinin 20 illik yubileyində Prezident Administrasiyasının İctimai-siyasi məsələlər şöbəsinin müdiri Əli Həsənov jurnalistlərə müsahibəsində söyləmişdir.
Bizi Xocalı faciəsindən cəmi 20 ilin ayırmasına baxmayaraq, artıq beynəlxalq təşkilatlar Xocalı soyqırımını tanımağa başlamışdır. Bu prosesin başlaması çox yaxşı haldır.
Əli Həsənov bildirmişdir ki, İslam Əməkdaşlıq Təşkilatının belə bir addımı atması o deməkdir ki, əksər İslam ölkələri bu hadisələrə qiymət verəcək, Xocalı soyqırımı beynəlxalq aləmdə tanınacaqdır. Bizim məqsədimiz Cənubi Qafqaz regionunda qisasçılıq əhval-ruhiyyəsi yaratmaq deyil, bu cür hadisələrin təkrarlanmasının qarşısını almaq, ermənilər tərəfindən aparılan anti-Azərbaycan siyasətinin təsirini azaltmaq, ermənilərin vəhşiliyini dünyada tanıtmaqdır.