"Azərsu" Açıq Səhmdar Cəmiyyəti istehlakçılara verilən içməli suyun uçotunun dəqiq aparılması, ödəniş səviyyəsinin yüksəldilməsi, debitor borc probleminin aradan qaldırılması və su itkilərinin qarşısının alınması məqsədilə "smart-kart" (ön ödənişli) tipli elektron su sayğaclarının quraşdırılması istiqamətində işləri sürətləndirir. 
Cari ilin may ayından Bakı, Abşeron və Sumqayıt sukanal idarələrinin xidmət göstərdiyi ərazilərdə belə sayğacların quraşdırılmasına başlanılmışdır. İlkin mərhələdə "smart-kart" tipli sayğaclar su sərfiyyatı yüksək olan yerlərdə, əsasən qeyri-əhali qrupu abunəçiləri üzrə quraşdırılırdısa, artıq ötən aydan başlayaraq əhali abunəçiləri üçün də belə sayğaclar quraşdırılmasına başlanılmışdır.
"Azərsu" ASC-nin mətbuat xidməti və ictimaiyyətlə əlaqələr şöbəsinin məlumatına görə, ötən bir ay ərzində Bakı şəhərində 1300-dən artıq əhali abunəçisi ön ödənişli sayğaclarla təmin olunmuşdur. Bununla paralel olaraq qeyri-əhali qrupu abunəçilərinə də yeni sayğacların quraşdırılması sürətləndirilmişdir.
Bütövlükdə isə ilin əvvəlindən indiyədək 9400-dən artıq qeyri-əhali qrupu abunəçisi "smart-kart" sayğacları ilə təmin olunmuşdur. Bununla da, ön ödənişli sayğaclardan istifadə edən abunəçilərin sayı 10700-ü ötmüşdür. Xatırladaq ki, su təchizatı və tullantı sularının axıdılması xidmətlərindən istifadə edən əhali qrupu istehlakçılarına "smart kart" tipli sayğacların quraşdırılması "Azərsu" ASC-nin müvafiq xidmət sahələri tərəfindən dövlət hesabına həyata keçirilir və bunlara görə istehlakçıdan heç bir ödəniş tələb olunmur. Qeyri-əhali qrupu abunəçiləri üçün sayğacların quraşdırılması isə "Azərsu" ASC-nin müvafiq xidmət sahələri tərəfindən istehlakçının vəsaiti hesabına aparılır.
Yeri gəlmişkən, 2012-ci il iyunun 20-də Prezident İlham Əliyevin sədrliyi ilə "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın icrasının birinci ilinin yekunlarına həsr olunmuş konfransda ölkə başçısı kommunal sektorda "smart-kart" tipli sayğacların quraşdırılmasının uğurlu nəticələr verdiyini xatırladaraq su təchizatı sektorunda yeni tipli su sayğaclarının quraşdırılmasının sürətləndirilməsi barədə tapşırıqlar vermişdir.

Mirbağır YAQUBZADƏ, "Xalq qəzeti"