Noyabrın 7-də Qafqaz Müsəlmanları İdarəsinin sədri Şeyxülislam Allahşükür Paşazadə Türkiyənin Azərbaycandakı səfiri İsmail Alper Coşkun ilə görüşmüşdür.
Qafqaz Müsəlmanları İdarəsindən (QMİ) AzərTAc-a bildirmişlər ki, görüşdə Şeyxülislam Allahşükür Paşazadə yeni təyin olunmuş səfirə gələcək fəaliyyətində uğurlar diləmiş, diplomatın qardaş ölkələrimiz və xalqlarımız arasında mövcud yüksək səviyyəli əlaqələrin, o cümlədən dini-mənəvi sahədə əməkdaşlığın daha da dərinləşdirilməsi istiqamətində səy göstərəcəyinə ümidvar olduğunu bildirmişdir.
Səfir İsmail Alper Coşkun QMİ-nin sədri Şeyxülislam Allahşükür Paşazadənin qardaş xalqlarımız arasında mənəvi əlaqələrin genişlənməsi istiqamətində səylərini yüksək dəyərləndirdiyini, Qafqazın dini liderinin bölgədə sülh və əmin-amanlığın bərqərar olması işinə verdiyi şəxsi töhfənin, qarşılıqlı anlaşma yönündə fəaliyyətinin böyük əhəmiyyət daşıdığını xüsusi vurğulamışdır.
Səfir QMİ-nin sədri Şeyxülislam Allahşükür Paşazadənin Avrasiya Forumunun noyabr ayında keçiriləcək növbəti toplantısına dəvət edilməsinin önəmli olduğunu, QMİ sədrinin bu və digər tədbirlər çərçivəsində qardaş dövlətə səfərlərinin dini-mənəvi münasibətlərimizin daha da dərinləşməsi baxımından qarşılıqlı əhəmiyyət kəsb etdiyini vurğulamışdır.