Bişkekdəki Türkdilli Dövlətlərin Siyasətinə Dəstək Fondunun təşəbbüsü ilə cari ilin əvvəllərində Bişkekdə rus dilində nəşr olunmuş "Prezident İlham Əliyev" üçcildliyi qırğız dilində də çap olunacaqdır. Üçcildliyi tanınmış tərcüməçi Mukan Asanaliyev və professor Baysabayev Bektursun tərcümə edirlər. 
Kitablarda Prezidentin xarici ölkələrə səfərləri, nitqləri, xarici dövlətlərin başçıları ilə görüşləri, müsahibə və bəyanatları öz əksini tapmışdır.
Mukan Asanaliyev Azərbaycan Prezidenti Administrasiyasının rəhbəri, akademik Ramiz Mehdiyevin Bişkekdə çap olunan "Gorus 2010: Absurd teatrı mövsümü" kitabını, "Manas eposu və türk dastançılıq ənənələri" monoqrafiyasını, görkəmli Azərbaycan yazıçısı Mir Cəlal Paşayevin "Seçilmiş əsərləri" üçcildliyini, Azərbaycanın xalq şairi Bəxtiyar Vahabzadənin "Gülüstan" poemasının qırğız, rus və ingilis dillərinə və bir çox başqa əsərləri qırğız dilinə tərcümə etmişdir.
Xatırladaq ki, fondun sifarişi ilə ölkələrimiz arasında mədəni-humanitar sahədə əlaqələrin genişləndirilməsi məqsədi ilə Azərbaycanın tarixi, mədəniyyəti, incəsənəti ilə bağlı indiyədək 45 kitab nəşr olunmuş və pulsuz yayılmışdır.

Qulu KƏNGƏRLİ, AzərTAc-ın xüsusi müxbiri 
Bişkek