Ermənistan KİV-nin verdiyi xəbərə görə əhalini sakitləşdirməyə çalışan Ermənistanın iqtisadi rəqabətin qorunması üzrə dövlət komissiyasının sədri Artak Şaboyan bildirmişdir ki, bahalaşma birbaşa beynəlxalq qiymətlərin qalxması ilə əlaqədardır. Bu da öz növbəsində daxili bazara təsirsiz ötüşməmişdir. Mətbuat yazır ki, ölkəni idarə edə bilməyən hökumət hər bir problemi xarici dövlətlərin üzərinə ataraq özünə haqq qazandırır. Bir sözlə, yenə də günah xaricdədir. Çörəyin qiymətinə gəlincə, A.Şaboyan deyir ki, bu sahədə kifayət qədər rəqabət gedir. Çörək istehsalı ilə onlarla müəssisə məşğul olur və onlardan heç biri bazarda dominantlıq edə bilmir. Amma yenə də bazarda qiymətlər qalxsa, onlar dərhal bunun səbəbini araşdıracaqlar. O yenə də yalan danışır, çünki rəqabət olan yerdə bahalaşma olmur. Bu bazar iqtisadiyyatının sadə prinsiplərindən biridir. 
Ermənistan əhalisi üçün bu gün çörək əsas qida məhsuludur və təbii ki, hər hansı yüksək vəzifəli məmurun izahatları onları qane etmir. Axı qiymətlər günlərlə deyil, saatlarla qalxır, həm də təkcə qalxan çörəyin qiyməti deyildir. Pendir, kəsmik, ət və digər ərzaq məhsulları da bahalaşır. Və bu, tamamilə xariclə bağlı deyildir.
Ermənistan mətbuatı qeyd etmişdir ki, bu iqtisadiyyatla "Böyük Ermənistan" qurmaq olmaz. Ermənistan mətbuatının təhlili göstərir ki, artıq erməni ictimaiyyəti qondarma "Böyük Ermənistan" ideyasına istehza ilə yanaşır. Bir çox ictimai-siyasi, mədəniyyət və incəsənət xadimləri isə qeyd edirlər ki, əvvəlcə xalqa çörək vermək lazımdır.