Azərbaycanda səfərdə olan Uruqvay Şərq Respublikası Milli Gömrük İdarəsinin baş direktoru Enrike Pedraqosanın rəhbərlik etdiyi nümayəndə heyəti Dövlət Gömrük Komitəsinin (DGK) Mərkəzi Hospitalı və Dünya Gömrük Təşkilatının Bakıdakı Potensialın Gücləndirilməsi üzrə Avropa Regional Ofisində olmuşdur. 
DGK-dan bildirmişlər ki, qonaqlara Mərkəzi Hospital və Dünya Gömrük Təşkilatının Bakıdakı Potensialın Gücləndirilməsi üzrə Avropa Regional Ofisinin fəaliyyəti barədə məlumat verilmişdir.
Eyni zamanda, Uruqvay nümayəndə heyəti DGK-nın Kinoloji Mərkəzində və "Azərterminalkompleks" Birliyinin inzibati binasında da olmuşdur.
Qonaqlar Xaçmaz Gömrük İdarəsinin "Samur" gömrük buraxılış məntəqəsinə də baş çəkmişlər. Məlumat verilmişdir ki, inşasına 2008-ci ildə başlanmış məntəqənin ərazisində müvəqqəti saxlanc yerləri və anbarlar, yeməkxana, inzibati bina, kinoloji xidmət üçün otaq inşa edilmişdir. Məntəqədə yüklərə və nəqliyyat vasitələrinə baxış ən müasir tələblər səviyyəsində həyata keçirilir. Diqqətə çatdırılmışdır ki, burada ixrac və idxal gömrük nəzarəti xətləri mövcuddur və gömrük buraxılış məntəqəsində "bir pəncərə" sistemi tətbiq edilir.
Uruqvay Gömrük Xidməti nümayəndə heyətinin Azərbaycana səfəri oktyabrın 6-dək davam edəcəkdir.