Bakı Beynəlxalq Humanitar Forumu mədəniyyətlərarası dialoqun inkişafına əvəzsiz töhfələr verəcəkdir.
Bu sözləri II Bakı Beynəlxalq Humanitar Forumunda iştirak etmək üçün ölkəmizə gəlmiş Koreya Respublikasının Hankuk Xarici Dillər Universitetinin xarici əlaqələr üzrə dekanı, professor Tae Yeonb Janq demişdir.
T.Janq forumda müzakirə ediləcək vacib məsələlərin bəşəriyyətin üzləşdiyi bir sıra problemlərin həlli yollarının tapılması işinə kömək edəcəyini əminliklə vurğulamışdır.
Professor T.Janq forumda dünyanın tanınmış siyasətçilərinin, Nobel mükafatı laureatlarının, bir sıra beynəlxalq təşkilatların nümayəndələrinin iştirak etməsini Azərbaycanın dünyada gündən-günə artan nüfuzunun bariz nümunəsi kimi səciyyələndirmişdir.
Qonaq həmçinin Bakı Beynəlxalq Humanitar Forumunun təşkilatçılığının yüksək səviyyədə olmasını xüsusi vurğulamışdır.
Bakının füsunkarlığından danışan koreyalı qonaq demişdir: "Gəzməli yerləriniz, fəvvarələriniz hər kəsdə yaxşı təəssürat yaradır. Burada hər şey səliqəlidir. Azərbaycanlılar çox mehriban və qonaqpərvərdirlər".

AzərTAc