UNESCO Daimi Nümayəndələri Klubunun (Cercle des Delegues) aparıcı üzvləri olan 14 ölkənin (Albaniya, Argentina, Avstraliya, Əfqanıstan, Cənubi Afrika, Honduras, Keniya, Konqo Demokratik Respublikası, Litva, Macarıstan, Madaqaskar, Niger, Oman, Portuqaliya, Seneqal) daimi nümayəndələri və müavinləri oktyabrın 4-5-də keçiriləcək Bakı Beynəlxalq Humanitar Forumda iştirak edəcəklər.
Azərbaycanın UNESCO yanında daimi nümayəndəliyindən bildirmişlər ki, qrupun tərkibinə UNESCO baş konfransının hazırkı prezidenti, Macarıstanın səfiri K.Bodyay, 33-cü baş konfransın keçmiş sədri, səfir Musa Bin Cəfər Bin Həsən, icraiyyə şurasının 158-162-ci sessiyalarının keçmiş sədri, səfir Sonia Mendieta de Badaroux, 4-cü elektoral qrupun sədri, səfir Gita Kamat, GKT qrupunun sədri, səfir Papa Momar Diop, Frankofoniya qrupunun sədr müavini Manda Kizabi və digərləri daxildirlər.
UNESCO səfirlərinin Forumun "dəyirmi masa"larında məruzələrlə çıxış edəcəkləri də nəzərdə tutulmuşdur.
Hazırda Daimi Nümayəndələr Klubuna Azərbaycanın UNESCO yanında daimi nümayəndəsi, səfir Eleonora Hüseynova sədrlik edir.

AzərTAc