Azərbaycanın belə bir foruma ev sahibliyi etməsi ölkəniz üçün çox əhəmiyyətlidir. Bunu Bakı Beynəlxalq Humanitar Forumunda iştirak etmək üçün ölkəmizə gəlmiş iqtisadiyyat üzrə Nobel mükafatı laureatı Edvard Preskot AzərTAc-a müsahibəsində demişdir. 
E.Preskot bildirmişdir ki, sizin ölkəniz haqqında xeyli məlumatlıyam. Azərbaycan Avropa ilə Asiyanı qovuşduran, strateji əhəmiyyətə malik bir ölkədir. Deyə bilərəm ki, Azərbaycan həm də müxtəlif sahələrdə bir çox ölkələr üçün yaxşı tərəfdaşdır. Forum isə bu tərəfdaşlığı daha da artıracaqdır. Ölkənizdə iqtisadi inkişaf nəzərə çarpır.
Bakı ilə bağlı təəssüratlarından söz açan amerikalı alim demişdir: "Buraya gələndə elə hesab edirdim ki, inkişafdan qalmış bir əyalət şəhəri ilə qarşılaşacağam. Amma gözlərim qarşısında açılan mənzərə, doğrusu, məni çox heyrətləndirdi. İki gün bu şəhərdə qonaq olacağam. İnanıram ki, Bakının əsrarəngiz gözəllikləri, qədim, tarixi yerləri ilə tanışlığa fürsət tapacağam".