Azərbaycan Xarici İşlər Nazirliyi rəsmi Bakının İrana hücum məqsədilə öz hərbi bazalarını İsrailə verəcəyi barədə bəzi kütləvi informasiya vasitələrində gedən məlumatları təkzib edib.
APA-nın məlumatına görə, Xarici İşlər Nazirliyinin mətbuat xidmətinin rəhbəri Elman Abdullayev bildirib ki, Azərbaycan dəfələrlə qonşu dövlətlərin ərazi bütövlüyünə hörmətlə yanaşdığını bəyan edib və öz ərazisindən qonşu dövlətə hücum məqsədilə istifadə olunmasına heç vaxt icazə verməz.
O, bu kimi məqalələrin əsassız və absurd olduğunu, reallığı əks etdirmədiyini və neqativ xarakter daşıdığını vurğulayıb.
Qeyd edək ki, "Reuters" agentliyi gizli mənbəyə istinadən İsrail İrana qarşı əməliyyata başlayacağı təqdirdə Azərbaycanın öz hərbi bazalarını İsrailə vermək imkanlarını nəzərdən keçirdiyini yazıb.