Azərbaycanın xarici işlər naziri Elmar Məmmədyarov BMT Baş Məclisinin 67-ci sessiyası çərçivəsində Türkmənistan Baş nazirinin müavini, eyni zamanda xarici işlər naziri olan Rəşid Meredov ilə görüşmüşdür. 
Xarici İşlər Nazirliyindən AzərTAc-a bildirmişlər ki, nazirlər ölkələrimiz arasında ikitərəfli münasibətlərin inkişaf perspektivlərini müzakirə etmişlər.
Görüşdə, həmçinin Azərbaycan ilə Türkmənistan arasında təhsil, mətbuat, iqtisadi, enerji və humanitar sahələrdə əlaqələrin genişləndirilməsi məsələləri barədə fikir mübadiləsi aparılmışdır.
E.Məmmədyarov iki ölkənin diplomatik tədris müəssisələri arasında əməkdaşlıq sazişinin imzalanması təşəbbüsü ilə çıxış etmişdir.
Türkmənistanlı nazir isə rəsmi informasiya agentlikləri arasında əməkdaşlıq sazişinin imzalanması təklifini irəli sürmüşdür.
Bundan əlavə, tərəflər Xəzər dənizinin hüquqi statusunun müəyyən olunması ilə bağlı fikir mübadiləsi aparmışlar.