Sentyabrın 28-də güclü leysan yağışı ilə müşaiyət olunan qeyri-sabit hava şəraiti ilə əlaqədar səhər saat 6:55 radələrində ölkənin əsas stansiyası olan "Azərbaycan" İES-də ildırım vurması nəticəsində 330 kilovoltluq yarımstansiyada yanğın baş vermişdir.
İldırım vurması nəticəsində hava açarı və 330 kilovoltluq gərginlik transformatoru, idarəetmə avtomatikasının əks-qəza avtomatika dövrələri zədələnmişdir. Avtomatika təhlükəsizliyi zədələndiyindən enerji sistemində fasilə yaranmışdır.
"Azərenerji" ASC-nin mətbuat xidmətindən aldığımız məlumata görə, qısa müddət ərzində görülmüş tədbirlər nəticəsində respublikanın şəhər və rayonlarında elektrik enerjisinin verilməsi tam təmin olunmuşdur.

Qəzənfər QASIMOV, "Xalq qəzeti"