Sumqayıt Şəhər İcra Hakimiyyətinin təşəbbüsü ilə Uşaq və Yeniyetmələrin Yaradıcılıq Mərkəzində ali məktəblərə qəbul imtahanlarında 600-dən yuxarı bal toplamış sumqayıtlı gənclərlə görüş keçirilmişdir.
Gənclər və İdman Baş İdarəsinin rəisi Musa Həsənov ali məktəblərə qəbul imtahanlarında yüksək nailiyyətlərlə tələbə adını qazananları təbrik edərək onlara şəxsi həyatlarında və təhsildə uğurlar arzulamışdır. Şəhər gənclərinin və idmançılarının əldə etdikləri uğurlardan danışan natiq, ümummilli lider, müasir Azərbaycan dövlətinin memarı və qurucusu Heydər Əliyevin müdrikliklə söylədiyi "Sumqayıt istedadlı, savadlı gənc oğlanlar və qızlar şəhəridir" ifadəsinin bir daha öz təsdiqini tapdığını vurğulamışdır.
Şəhər Təhsil Şöbəsinin müdiri, əməkdar müəllim Vidadi Bağırov tədbir iştirakçılarını son qəbul imtahanlarında Sumqayıt məktəblərinin iştirakı barədə hazırlanmış analitik nəticələrlə tanış etmişdir. Bildirilmişdir ki, bu yay imtahanlarda 92 sumqayıtlı abituriyent 600 baldan yuxarı nəticə göstərmişdir. Natiq bu imtahanların da Sumqayıt təhsili üçün uğurlu sayıla biləcəyini söyləmiş, tələbə gənclərə ən xoş arzularını çatdırmışdır.
Sonda ali məktəblərə qəbul imtahanlarında 600-dən yuxarı bal toplayan sumqayıtlı gənclərə Baş İdarənin fəxri fərmanları və hədiyyələri təqdim edilmişdir.

Əli NƏCƏFXANLI, "Xalq qəzeti"nin bölgə müxbiri