Azərbaycanın xarici işlər naziri Elmar Məmmədyarov Bolqarıstanın ölkəmizdə yeni təyin olunmuş səfiri xanım Maya Hristova ilə görüşmüşdür.
Xarici İşlər Nazirliyinin mətbuat xidmətindən AzərTAc-a bildirmişlər ki, nazir E.Məmmədyarov Maya Hristovanı ölkəmizdə səfir təyin olunması münasibətilə təbrik etmiş, fəaliyyətində ona uğurlar arzulamışdır. Nazir yeni səfirin fəaliyyətinin iki ölkə arasındakı münasibətlərin daha da inkişafına töhfə verəcəyinə əminliyini vurğulamışdır.
Görüşdə Azərbaycan ilə Bolqarıstan arasında münasibətlərin mövcud vəziyyətindən məmnunluq ifadə edilmiş və bu əməkdaşlığın genişləndirilməsi üçün böyük potensialın olduğu bildirilmişdir.
M.Hristova Azərbaycanda səfir təyin edilməsindən məmnun olduğunu diqqətə çatdırmış, ölkəsinin Azərbaycan ilə bütün sahələrdə, xüsusilə də enerji sahəsində əməkdaşlıqda maraqlı olduğunu bildirmişdir.