Sentyabrın 20-də Neftçilər Günü münasibətilə Azərbaycan Respublikası Dövlət Neft Şirkətində (ARDNŞ) mənzil növbəsində duran neftçilər üçün Badamdar qəsəbəsində tikilmiş yeni yaşayış binası istifadəyə verilmişdir.
Bu münasibətlə keçirilən tədbirdə çıxış edən ARDNŞ-in prezidenti Rövnəq Abdullayev neftçiləri peşə bayramları münasibətilə təbrik etmiş, onlara gələcək fəaliyyətlərində uğurlar arzulamışdır.
Prezident İlham Əliyevin iqtisadiyyatın neft sektoruna və neftçilərə göstərdiyi diqqət və qayğıdan danışan R.Abdullayev Azərbaycanın inkişafı naminə şirkətin əməkdaşlarının daim ölkə başçısının siyasi kursunu dəstəkləyəcəklərinə əminliyini vurğulamışdır.
Qeyd olunmuşdur ki, istifadəyə verilən bina neftçilərin mənzil şəraitinin yaxşılaşdırılması istiqamətində ARDNŞ-in həyata keçirdiyi sosial proqramın tərkib hissəsidir.
Sonra yeni mənzillərə baxış olmuşdur.
On iki mərtəbəli binada 60 üçotaqlı və 36 ikiotaqlı (ümumilikdə 96) mənzil vardır. Mənzillər sahiblərinə tam təmirli və mətbəx avadanlığı quraşdırılmaqla təhvil verilmişdir.
Neftçilər onlara göstərilən qayğıya görə dövlət başçısına minnətdarlıqlarını bildirmişlər.

AzərTAc