Sentyabrın 14-də Azərbaycan Respublikası Prezidenti Administrasiyasının rəhbəri Ramiz Mehdiyevin və Administrasiyanın şöbə müdirlərinin Türkiyənin ölkəmizdə diplomatik fəaliyyəti başa çatan fövqəladə və səlahiyyətli səfiri Hulusi Kılıç ilə görüşü olmuşdur.  
Dost və qardaş ölkənin səfiri Hulusi Kılıçı səmimi salamlayan Ramiz Mehdiyev diplomatın Azərbaycan ilə Türkiyə arasında əlaqələrin inkişafındakı xidmətlərini yüksək qiymətləndirmişdir.
Prezident Administrasiyasının rəhbəri dövlətimizin başçısı İlham Əliyevin Sərəncamına əsasən "Dostluq" ordeni ilə təltif olunması münasibətilə Hulusi Kılıçı təbrik etmiş, ona gələcək fəaliyyətində uğurlar arzulamışdır.
Ölkəmizdə diplomatik fəaliyyəti dövründə həm Türkiyəyə, həm də Azərbaycana xidmət etdiyini vurğulayan Hulusi Kılıç yüksək dövlət mükafatı - "Dostluq" ordeni ilə təltif olunduğuna görə Azərbaycan Prezidenti İlham Əliyevə bir daha minnətdarlığını bildirmişdir. Ölkəmizdəki diplomatik fəaliyyətindən qürur hissi keçirdiyini deyən səfir Azərbaycana olan sevgisini həmişə qəlbində yaşadacağını vurğulamışdır.

AzərTAc