Paralimpiya Oyunlarında qızıl medal qazanmağımda yığma komandanın bütün məşqçilərinin böyük rolu olmuşdur.
Bu sözləri AzərTAc-a müsahibəsində XIV London Paralimpiya Oyunlarının qızıl medalını qazanmış cüdoçumuz Ramin İbrahimov (60 kq) demişdir.
Qızıl medal uğrunda çətin görüşlər keçirdiyini söyləyən cüdoçu Paralimpiya Oyunlarını qalib kimi başa vuracağına inandığını bildirmişdir: "Azərbaycan bayrağının Londonda dalğalanması və dövlətimizin himninin səsləndirilməsi çox qürurverici idi. Öz üzərimdə çalışıb yeni uğurlara doğru inamla addımlamağa çalışacağam. 2016-cı ildə Rio-de-Janeyroda təşkil olunacaq Paralimpiya Oyunlarında bu ilk uğurumu təkrarlayıb ikiqat paralimpiya çempionluğunu bayram etmək istərdim".