"Macarıstan bilirdi ki, qətldə təqsirli bilinən Ramil Səfərovun öz ölkəsinə - Azərbaycana verilməsi Ermənistanda əks reaksiyalar doğuracaq". Bunu Macarıstanın Baş naziri Viktor Orban sentyabrın 11-də deyib. Məlumatı "Azadlıq" radiosu "Röyter" agentliyinə istinadla yayıb.
Macarıstan mətbuatı yazmışdı ki, baş nazir belə reaksiyalar barədə xəbərdar edilsə də, bu qərarı verib. Viktor Orban isə mətbuatın yazdıqlarına münasibət bildirərək deyib ki, hökumət daxilində bu məsələ ilə bağlı yekdillik olub: "Hər bir nazirlik öz mövqeyini bildirib. Ədliyyə Nazirliyi hüquqi baxımdan, Xarici İşlər Nazirliyi diplomatik nəticələrlə bağlı öz baxışlarını ortaya qoyub".
Baş nazir qeyd edib ki, o, ümumi prosesin sonunda qərar verib: "Xarici İşlər Nazirliyi hansı nəticələr ola biləcəyi haqda dəqiq proqnoz vermişdi. Əvvəlcədən hesablamadığımız hər hansı bir hadisə baş vermədi".