"Blomberq" agentliyi yazır ki, "bp" şirkəti Meksika körfəzində bir neçə neft yatağını satmaq barədə qərar qəbul edib. Şirkət 2013-cü ilin sonuna kimi bütövlükdə 38 milyard dollarlıq aktivlərini satmağı planlaşdırır. Xatırladaq ki, 2010-cu ildən sonrakı il yarım ərzində böyük britaniyalılar bu yataqlara 26,5 milyard dollar sərmayə yatırıblar.  
2010-cu ildə Meksika körfəzində "bp"yə məxsus yataqlarda ağır qəza baş vermiş, yüz min tonlarla xam neft körfəz sularına axmışdı. Tətbiq edilən yüksək cərimələrin ödənilməsi üçün şirkətə böyük vəsait lazımdır. Lakin "bp" Meksika körfəzindəki işlərindən birdəfəlik əl çəkmək fikrində deyil. Belə ki, "bp"nin mətbuat xidmətinin rəhbəri Skott Din dünən deyib ki, şirkət körfəzin bir sıra digər neft yataqlarının işlənilməsi və istismarı üzrə müqavilə öhdəliklərini davam etdirmək niyyətindədir.
Qeyd edək ki, bir müddət əvvəl "bp" Meksika körfəzindəki ona məxsus olan yataqların aktivlərinin bir hissəsini ABŞ-ın "Tesorp Corporeyşn" şirkətinə satmışdı. Sövdələşmənin dəyəri 1,18 milyard dollar olub.

M.HACIXANLI, "Xalq qəzeti"