Xəbər verdiyimiz kimi, Kür və Araz çaylarında suyun səviyyəsinin qalxması ilə əlaqədar daşqınların əmələ gəlməsi dəmir yolunun işində də ciddi problemlər yaratmış, "Azərbaycan Dəmir Yolları" Qapalı Səhmdar Cəmiyyətinin (QSC) Şirvan-Astara sahəsində mayın 9-da saat 16.30-dan etibarən qatarların hərəkəti dayandırılmışdır.
QSC-dən bildirmişlər ki, iyunun 13-dən etibarən qurum sədrinin müavini Qurban Nəzirovun rəhbərliyi ilə dəmir yolunun Şirvan-Astara sahəsində təmir-bərpa işləri çox mürəkkəb bir şəraitdə davam etdirilir. Görülən işlər nəticəsində Osmanlı-Azadkənd mənzilinin 15-ci kilometrində 30 metr, Azadkənd-Salmanlı mənzilinin 24-cü kilometrində 20 metr irəliləməyə nail olunmuşdur. Osmanlı-Azadkənd arasında birtərəfli çökmüş yol yatağının 8 kilometri bərpa edilmişdir.
Təmir-bərpa işlərində QSC-nin infrastruktur departamentinin, təmir-bərpa qatarlarının və digər müvafiq strukturlarının kollektivləri çalışırlar.
Ərazidən su tam çəkilmədiyinə görə QSC-nin həkim-sanitar xidmətinin yerli təşkilatları gündə bir neçə dəfə profilaktiki tədbirlər aparırlar. Osmanlı stansiyasında yaradılmış tibb məntəqəsində dəmiryolçular mütəmadi müayinə olunurlar.
AzərTAc{nl}