Azərbaycan Respublikasının İran İslam Respublikasındakı səfiri Cavanşir Axundov bu ölkənin Şərqi Azərbaycan vilayətinin başçısı Əlirza Beygi ilə görüşmüşdür.
Avqustun 11-də vilayətdə baş vermiş zəlzələdə həlak olanların qohumlarına bir daha başsağlığı verən diplomat yaralılara Allahdan şəfa diləmiş və bildirmişdir ki, Azərbaycan İranın bu faciəsini özünün faciəsi kimi qəbul edir. C.Axundov zəlzələ bölgəsinə Azərbaycandan olan yardımının davamı kimi zərərçəkmiş qəsəbələrdən birində müasir məktəbin və yaxud xəstəxananın tikintisi ilə bağlı hökumətimizin təklifini vilayətin başçısının diqqətinə çatdırmışdır.
Zəlzələ bölgəsinə göstərilmiş hərtərəfli yardıma görə Azərbaycan Respublikasına bir daha minnətdarlığını bildirən Ə.Beygi qeyd etmişdir ki, xalqlarımız tarixən pis gündə də, yaxşı gündə də bir-birilərinin yanında olmuşlar.
Səfər çərçivəsində zəlzələ bölgəsinə baş çəkən Azərbaycan səfiri burada aparılan quruculuq və bərpa işləri ilə tanış olmuş, yerli əhali ilə söhbət etmişdir.

Sabir ŞAHTAXTI AzərTAc-ın xüsusi müxbiri
Təbriz