Yaponiyanın maliyyə və poçt xidməti islahatları naziri Tadahiro Matsusita sentyabrın 10-da Tokiodakı evində ölmüş vəziyyətdə tapılıb.
APA-nın xəbərinə görə, Tokio polisindən nazirin meyitinin asılmış vəziyyətdə tapıldığı bildirilib.
Hadisənin dəqiq səbəbləri hələlik bəlli deyil, nazirin öldürüldüyü və ya özünü öldürdüyü versiyaları araşdırılır. İntihara sövq edə biləcək səbəblər barədə məlumat verilmir. Yalnız o məlumdur ki, nazir həmin günə planlaşdırdığı bir sıra rəsmi görüşləri əvvəlcədən ləğv edib.
Qeyd edək ki, 73 yaşlı Tadahiro Matsusita Yeni Xalq Partiyasının üzvü olub, müxtəlif dövrlərdə nazir postu tutub. O, Sosial sığorta və vergi, Kosmik tədqiqatlar və elmi-texniki siyasət nazirliklərinə rəhbərlik etmişdir.