Sentyabrın 7-də futbol üzrə dünya çempionatının seçmə mərhələsi çərçivəsində Azərbaycan millisi ilk oyununu keçirmişdir.
AzərTAc xəbər verir ki, millimiz Tofiq Bəhramov adına Respublika stadionunda İsrail yığmasını qəbul etmişdir. Qarşılıqlı hücumlar şəraitində keçən matçın ilk hissəsində hesab açılmamışdır.
Fasilədən sonra - qarşılaşmanın 50-ci dəqiqəsində İsrail millisinin futbolçusu Natxo hesabı açmışdır. İnamlı oyun nümayiş etdirən Azərbaycan millisi görüşün 65-ci dəqiqəsində Ruslan Abışovun dəqiq zərbəsi ilə hesabı bərabərləşdirmişdir.
Beləliklə, Azərbaycan-İsrail oyunu 1:1 hesablı heç-heçə ilə başa çatmışdır. Millimiz növbəti oyununu sentyabrın 11-də Braqa şəhərində Portuqaliya yığmasına qarşı keçirəcəkdir.