Sentyabrın 7-də Qəbələdəki "Qafqaz Sport" otelində Azərbaycan Respublikasının fövqəladə hallar naziri, general-polkovnik Kəmaləddin Heydərov və Litva Respublikasının daxili işlər naziri Arturas Melianasın başçılıq etdiyi nümayəndə heyəti arasında görüş keçirilmişdir.
AzərTAc xəbər verir ki, görüş zamanı fövqəladə hallar zamanı əməkdaşlıq, iki ölkənin mütəxəssislərinin birgə iştirakı ilə fövqəladə hallar sahəsində kadrların hazırlanması, birgə təlimlərin keçirilməsi məsələləri müzakirə edilmişdir.
Sonra iki ölkənin hökumətləri arasında fövqəladə halların qarşısının alınması, aradan qaldırılması sahəsində əməkdaşlıq və qarşılıqlı yardım haqqında saziş imzalanmışdır.
Litvanın daxili işlər naziri Arturas Melianas və onun rəhbərlik etdiyi nümayəndə heyəti Azərbaycan Respublikası Fövqəladə Hallar Nazirliyinin Böhran Vəziyyətlərində İdarəetmə Mərkəzinin, Dövlət Yanğından Mühafizə Xidmətinin, Mülki Müdafiə Qoşunlarının Komandanlığının, Xüsusi Riskli Xilasetmə Xidmətinin və nazirliyin akademiyasının fəaliyyəti ilə tanış olmuşdur.