Fransada rəsmi səfərdə olan Azərbaycanın xarici işlər naziri Elmar Məmmədyarov sentyabrın 3-də ATƏT-in Minsk qrupunun həmsədrləri ilə görüşmüşdür. Görüşdə əsas müzakirə mövzusu Ermənistan qoşunlarının işğal olunmuş torpaqlarımızdan çıxarılması olmuşdur.  
AzərTAc xəbər verir ki, bu sözləri sentyabrın 3-də jurnalistlərə açıqlamasında Xarici İşlər Nazirliyinin mətbuat xidmətinin rəhbəri Elman Abdullayev demişdir.
Xarici siyasət idarəsinin rəsmisi bildirmişdir ki, görüşdə E.Məmmədyarov işğalın danılmaz bir fakt olduğunu və regionun gələcək inkişafını şübhə altına aldığını diqqətə çatdırmışdır. Azərbaycan Ordusunun zabiti Ramil Səfərov ilə bağlı məsələyə münasibət bildirən nazir demişdir: "Bu məsələ işğalın davam etməsi ilə bağlıdır. Həmsədrlər Ermənistanın işğalçı qüvvələrinin Azərbaycandan çıxarılmasına səy göstərməlidirlər".