Dünən Macarıstandan Bakıya gətirilən və ölkə Prezidentinin imzaladığı əfv sərəncamı ilə azadlığa buraxılan Azərbaycan Ordusunun zabiti Ramil Səfərovun ata evinə axın başlayıb. APA-nın Ramil Səfərovun ata evində olan əməkdaşı xəbər verir ki, onun gəlişi münasibəti ilə qurban kəsilib.
Ramil Səfərov burada bir daha Azərbaycana qaytarılmasına, əfv olunmasına görə ölkə Prezidenti, Ali Baş Komandan İlham Əliyevə təşəkkür edib: "Səkkiz il yarım qürbətdə təkadamlıq kamerada qalsam da, bir gün də ümidimi itirmədim. Vaxtı çatanda Ali Baş Komandan məsələni həll etdi. Mən bundan sonra da dövlətimə, millətimə xidmət etməyə hazıram".
R.Səfərov hərbi xidmətini davam etdirəcəyi barədə ona ünvanlanan suala cavabında bunu mümkün saydığını deyib.
Erməni zabitini qətlə yetirdiyi gün barədə suala isə "Mən o günə qayıtmaq istəmirəm" cavabını verib.