Hər bir azərbaycanlı gənc çalışmalıdır ki, ətrafındakı insanlara Azərbaycanın tarixi, mədəniyyəti, xüsusilə də Ermənistan-Azərbaycan, Dağlıq Qarabağ münaqişəsi haqqında mümkün qədər geniş məlumat versin.
Bu sözləri Xaricdə Təhsil Alan və Məzun olan Azərbaycanlı Tələbələrin Beynəlxalq Forumunun (ASAİF) X Yay Forumunda iştirak edən Moskva Dövlət Hüquq Akademiyasının beynəlxalq hüquq fakültəsinin magistrantı Nəcibə Mustafayeva AzərTAc-a müsahibəsində söyləmişdir. ASAİF fəaliyyətə başlayandan bu qurumun üzvü olduğunu deyən N.Mustafayeva artıq iki ildir ki, forumda iştirak etdiyini bildirmişdir.
N.Mustafayeva demişdir: "ASAİF-ə üzv olmaq mənim üçün çox önəmlidir. Çünki xaricdə təhsil alan digər gənclərlə bu qurum vasitəsilə əlaqə saxlanılır, yeni ünsiyyətlər yaranır və beləliklə, aramızda şəbəkələşmə prosesi güclənir. Xaricdə təhsil alan azərbaycanlı gənclərin əsas məqsədlərindən biri də ölkəmizin haqlı mövqeyini əcnəbi tələbələrə çatdırmaqdır. İnanıram ki, ASAİF Ermənistan-Azərbaycan, Dağlıq Qarabağ münaqişəsi ilə bağlı həqiqətlərin dünya ictimaiyyətinə çatdırılmasında böyük rol oynayacaqdır.