Binəqədi Rayon İcra Hakimiyyətində Qarabağ müharibəsi əlilləri və şəhid ailələri, habelə imkansız şəxslər üçün müqəddəs Ramazan bayramı münasibətilə mərasim keçirilmişdir. 
Rayon icra hakimiyyətinin başçısı Xaləddin İsgəndərov mərasimdə çıxış edərək iştirakçılara bol ruzi, xoşbəxt həyat arzulamışdır. Bildirmişdir ki, ölkəmizdə həmişə milli-mənəvi dəyərlərlə yanaşı, dini dəyərlərə və prinsiplərə də ən yüksək səviyyədə diqqət və qayğı göstərilməkdədir. Ramazan həmrəylik, dostluq, qardaşlıq, sevgi, mərhəmət və ruzi ayıdır. Azərbaycanda Ramazan günlərində təşkil olunan iftar süfrələri də ölkəmizdə ənənəvi tolerantlığı və sıx birliyi nümayiş etdirir.
Natiq daha sonra respublikamızda hökm sürən sabitliyin, inkişafın, birliyin, vicdan azadlığı və tolerantlığın təməlində ulu öndər Heydər Əliyevin müdrik siyasətinin dayandığını xüsusi vurğulamışdır. Başçı eyni zamanda bu siyasəti Prezident İlham Əliyevin uğurla həyata keçirdiyini, Azərbaycanda gedən sürətli sosial-iqtisadi inkişafı, nümunəvi tolerantlığı beynəlxalq birliyin də etiraf etdiyini diqqətə çatdırmışdır.
Sonda mərasim iştirakçılarına müqəddəs Ramazan münasibətilə bayram sovqatı paylanılmışdır.

Vaqif BAYRAMOV, "Xalq qəzeti"