Mədəniyyət və Turizm Nazirliyinin rəsmi saytı (mct.gov.az) Azərbaycanın Misirdəki səfirliyinin məlumatına istinadən bildirib ki,bu günlərdə Qahirədə keçirilən V Səma Beynəlxalq Musiqi Festivalında ölkəmiz kamança ustası və müğənni Mehri Əsədullayeva və onu müşayiət edən musiqi kollektivi tərəfindən yüksək səviyyədə təmsil olunmuşdur. 
Festivalda Azərbaycanla yanaşı, Türkiyə, ABŞ, Fransa, Çin, Hindistan, İraq, Pakistan, Ukrayna, Yəmən, İspaniya, Ekvador, Zambiya, Bosniya və Herseqovina, İndoneziya və digər dövlətlərdən də musiqiçilər iştirak etmişlər.
Ramazan ayı müddətində keçirilən Səma musiqi festivalı Misirdə və Yaxın Şərq regionunda ən böyük və nüfuzlu tədbirlərdən biri hesab olunur. Tədbir çərçivəsində Mehri Əsədullayeva Misirin "Məhəmməd Əli" və "Əl-Quturi" kimi möhtəşəm saraylarında keçirilən konsert proqramlarında çıxış etmişdir. Festivalın rəhbəri tərəfindən "dünyanın ən istedadlı qadın kaman ustası" kimi təqdim olunan sənətçimizin ifasında Azərbaycan musiqisi nümunələrindən parçalar tamaşaçılar tərəfindən böyük maraqla qarşılanmışdır.
Festival Misirin kütləvi informasiya vasitələri tərəfindən geniş şəkildə işıqlandırılmışdır.

M.MÜKƏRRƏMOĞLU, "Xalq qəzeti"