Hər dəfə Qəbələdə səhnəyə çıxdığımız zaman tamaşaçı alqışları ilə əhatə olunuruq. Bu, musiqiçi üçün vacib bir hissdir. Qəbələdə görkəmli sənət adamları ilə birgə konsertlər veririk. Mən çəkinmədən deyə bilərəm ki, burada özümü çox xoşbəxt hiss edirəm. 
AzərTAc xəbər verir ki, bu sözləri Qəbələ IV Beynəlxalq Musiqi Festivalının iştirakçısı, Rusiya Musiqi Akademiyasının müəllimi, "Moskva virtuozları" kamera orkestrinin konsertmeysteri viola ifaçısı Aleksandr Akimov jurnalistlərə müsahibəsində demişdir. O, belə möhtəşəm festivalın yüksək səviyyədə təşkili üçün çox vaxt sərf olunduğunu və xeyli zəhmət çəkildiyini bildirmişdir.
A.Akimov demişdir: "Bu gözəl məkanın insanları çox səmimi, qonaqpərvərdirlər. Sizin musiqiçilərlə tanış oldum, yeni dostlar qazandım. Festival çox yüksək səviyyədə təşkil olunmuşdur. Qəbələyə ilk gəlişimdir və bu günləri heç vaxt unutmayacağam. Onu deməliyəm ki, gözəl təbiəti olan Qəbələdə klassik musiqi insana böyük zövq verir. Qəbələ festivalına uzun illər və daha böyük uğurlar arzu edirəm. İnanıram ki, uzun illər musiqisevərlər bu festivaldan zövq alacaqlar. Burada musiqinin müxtəlif janrları təbliğ olunur. Konsertimiz gözəl keçdi. Auditoriyanın musiqi duyumu da əla idi.