Xəbər verdiyimiz kimi, paytaxtın Binəqədi rayonunda Dərnəgül yaşayış sahəsi, Səttar Bəhlulzadə küçəsi, 31 ünvanında məcburi köçkünlərin məskunlaşdığı Azərbaycan Dövlət İqtisad Universitetinin 4 nömrəli yataqxanasında yanğın baş vermişdir. 
Azərbaycan Respublikasının Prezidenti İlham Əliyevin tapşırığı ilə Nazirlər Kabinetinin qəbul etdiyi müvafiq sərəncama əsasən, yanğından zərər çəkmiş 114 nəfərdən ibarət 32 məcburi köçkün ailəsinə birdəfəlik maddi yardım ayrılmışdır.
Yanğının baş verdiyi yataqxananın yaxınlığında quraşdırılmış çadırlarda müvəqqəti yaşayan zərər çəkənlərə nəzərdə tutulmuş maddi yardımlar avqustun 3-də paylanmışdır.
Sərəncama uyğun olaraq bir nəfərlik ailəyə 1000 manat, iki nəfərlik ailəyə 1800 manat, üç və daha çox şəxslərdən ibarət ailələrin hər bir üzvünə 800 manat yardım verilmişdir.
Məcburi köçkünlər baş vermiş hadisə ilə əlaqədar yaranmış çətinliklərinin aradan qaldırılması istiqamətində dərhal atılan addımlara görə Azərbaycan Prezidentinə minnətdarlıqlarını bildirmişlər.

AzərTAc