Azərbaycan informasiya texnologiyaları sahəsində böyük nailiyyətlər əldə etmişdir. Bu fikir "Azərbaycanda informasiya-kommunikasiya texnologiyalarının (İKT) inkişaf perspektivləri və Azərbaycanın regiona təsiri" mövzusunda keçirilən tədbirdə səslənmişdir.
Tədbirdə çıxış edən Azərbaycan Diplomatik Akademiyasının rektoru Hafiz Paşayev ölkəmizin bölgədəki yüksək nüfuzundan danışmışdır.
Sonra İKT-nin inkişaf perspektivləri haqqında mühazirə oxuyan rabitə və informasiya texnologiyaları naziri Əli Abbasov Azərbaycanda həyata keçirilən islahatlardan söz açmışdır. Bildirilmişdir ki, ölkəmizdə İKT sahəsində liberal mühitin formalaşması nəticəsində hər ay iyirmiyə yaxın şirkət yaranır. Artıq bu gün Azərbaycan informasiya texnologiyaları sahəsində regionun lider ölkəsinə çevrilmişdir.