Rusiya Suriyanın Tartus limanında yerləşən hərbi bazasına hücum olunacağı təqdirdə şəxsi heyəti təxliyyə edə biləcək. 
APA-nın Moskva müxbirinin verdiyi məlumata görə, bu barədə Rusiya Dəniz Qüvvələri komandanı Viktor Çirkov "Exo Moskvı" radiosuna açıqlamasında bildirib: "Tartus limanında yerləşən hərbi bazada olan şəxsi heyətin təxliyyəsi ilə bağlı qərarı təkcə mən vermirəm. Məsələ ilə bağlı Ali Baş Komandan, Rusiya Prezindentinin əmri gərəkdir. Lakin biz, istədiyimiz vaxt hərbi hissədə olan şəxsi heyəti təxliyyə edə biləcək vəziyyətdəyik".
Qeyd edək ki, dünən Rusiya Silahlı Qüvvələri Baş Qərargahından verilən açıqlamada Suriyanın Tartus limanında yerləşən Rusiya Hərbi Dəniz Donanmasına müxalifət qüvvələrinin hücum edəcəyi təqdirdə Rusiyanın qarşılıq verəcəyi barədə Suriya müxalifətinə xəbərdarlıq edildiyi bildirilib: "Əgər Suriyanın silahlı müxalifət qrupları Rusiyanın hərbi bazasına hər hansı bir təhlükə törədərsə və ya hücüm edərsə, Rusiya bölgədə bu hücumlara və təhlükəyə cavab verə biləcək gücdədir. Ona görə də Suriya müxalifətinə belə bir fəsad törətməyi məsləhət görmürük".