Ermənistan kütləvi informasiya vasitələri BMT-nin adından Azərbaycana qarşı dezinformasiya yayaraq, növbəti dəfə beynəlxalq ictimaiyyəti çaşdırmağa çalışır. 
Xarici İşlər Nazirliyinin mətbuat katibi Elman Abdullayevin sözlərinə görə, Ermənistan mediasında dərc edilmiş BMT baş katibi Pan Gi Munun Azərbaycanı Cənubi Qafqazda təhlükəli silahlanmaya başlamaqda ittiham etməsi dezinformasiyadır: "Yayılmış bu informasiyanın BMT-nin mövqeyinə heç bir aidiyyəti yoxdur. Bu, Ermənistanın daha bir dezinformasiya yaymaq cəhdidir. Əslində bu sənəd bir sıra ölkələrin, o cümlədən Ermənistanın BMT baş katibinin göndərdiyi sorğuya cavabıdır. Bununla da bu məlumat, BMT-nin deyil, Ermənistanın mövqeyini əks etdirir". XİN rəsmisi deyib ki, Ermənistanın bu cəhdləri hər hansı nəticə verməyəcək: "Çünki artıq dünya birliyi, o cümlədən BMT Təhlükəsizlik Şurası Ermənistanın Azərbaycan ərazilərini işğal etdiyini, işğalçı dövlət olduğunu bəyan ediblər".