Muxtar respublikada kənd yollarının yenidən qurulması, müasir və rahat yol şəbəkələrinin yaradılması istiqamətində həyata keçirilən tədbirlərin davamı olaraq hazırda Biləv-Behrud-Parağa avtomobil yolunda yenidənqurma işləri aparılır.
Naxçıvan Muxtar Respublikası Ali Məclisinin sədri Vasif Talıbov Biləv-Behrud-Parağa avtomobil yolunda aparılan yenidənqurma işləri ilə maraqlanmışdır.
Yolun texniki-iqtisadi göstəriciləri barədə Ali Məclisin sədrinə məlumat verilmişdir. Bildirilmişdir ki, uzunluğu 7 kilometr olan Biləv-Behrud-Parağa avtomobil yolunun tikintisinə bu ilin aprel ayından başlanılmışdır. Tikinti işləri zamanı 4 metrlik yol yatağı genişləndirilərək 8 metrə çatdırılmış, yolun dağlıq ərazilərdən keçən hissələrində istinad divarları çəkilmiş, selovlardan keçən hissələrdə 8 su keçidi tikilmiş, yol üzərindəki körpü təmir olunmuşdur. Hazırda yola asfalt örtüyünün salınması məqsədilə son tamamlama işləri aparılır. Yolun asfalt örtüyünün eni 7,2 metr olacaq, avtomobillərin ikizolaqlı hərəkəti təmin ediləcəkdir.
Ali Məclisin sədri Biləv-Behrud-Parağa avtomobil yolunda aparılan tikinti işləri ilə əlaqədar müvafiq tapşırıqlar vermişdir.

AzərTAc