Astara rayonunun Kələdəhnə kəndi ərazisində sahil nəzarəti məntəqəsinin xidməti sahəsində İran İslam Respublikası istiqamətindən Azərbaycan Respublikasının dəniz sərhədini pozmuş 3 nəfər İran vətəndaşı (1978-ci il təvəllüdlü Elcalı Adil Abdulhüseyn oğlu, 1979-cu il təvəllüdlü Mehdi Aslan Xudaverən oğlu, 1967-ci il təvəllüdlü Seyid Qulamrıza Mirəziz oğlu) Dövlət Sərhəd Xidməti (DSX) və Gömrük Komitəsi (GK) əməkdaşlarının birgə keçirdikləri əməliyyat-axtarış tədbirləri nəticəsində iyulun 13-də yaxalanmışdır. 
DSX-nın mətbuat mərkəzindən AzərTAc-a bildirmişlər ki, saxlanılarkən sərhədçilərin qanuni tələblərinə tabe olmayan sərhəd pozucuları əllərindəki qaçaqmalı dənizə ataraq qayıqla hadisə yerindən uzaqlaşmağa cəhd göstərmişlər. Lakin sərhəd gözətçi kateri qaçaqmalçıların qayığını təqib edərək onları sahildən 2,2 mil aralıda yaxalamışdır. DSX-nin dalğıcları xüsusi avadanlıqdan istifadə etməklə dənizin dərinliyindən 10 kiloqram narkotik olan həşişi aşkarlayaraq çıxarmışlar.
İyulun 18-də DSX əməkdaşları tərəfindən Qusar rayonunun Rusiya Federasiyası ilə həmsərhəd olan Dakar kəndi ərazisində yerləşən sahibsiz tikilidə gizlədilmiş lüləsi kəsik silah, patrondaş və bir ədəd bıçaq aşkarlanaraq götürülmüşdür.
İyulun 20-də Astara rayonunun Sim kəndi yaxınlığındakı sərhəd zastavasının xidməti ərazisində İran İslam Respublikası istiqamətindən dövlət sərhədini pozmağa cəhd göstərən 2 nəfərin qarşısı alınmışdır. Sərhədi pozmağa cəhd göstərən şəxslər əllərindəki qaçaqmalı hadisə yerində atmış, havanın dumanlı olmasından istifadə edərək, geriyə - İran ərazisinə qaçmışlar. Hadisə yerinə keçirilmiş baxış zamanı qaçaqmalçılara məxsus 1 kq narkotik vasitə olan həşiş və 2 qrama yaxın heroin aşkarlanaraq götürülmüşdür.
Hazırda hər üç fakt üzrə Dövlət Sərhəd Xidməti tərəfindən əməliyyat-istintaq tədbirləri davam etdirilir.