Azərbaycanın Təbrizdəki baş konsulluğu İranda həbs olunmuş Azərbaycan Respublikası vətəndaşlarının öz qohumları ilə görüşünə razılıq almağa müvəffəq olmuşdur. 
Bu barədə iyulun 18-də jurnalistlərə Azərbaycanın Xarici İşlər Nazirliyinin (XİN) mətbuat xidmətinin rəhbəri Elman Abdullayev məlumat vermişdir.
XİN-in sözçüsü qeyd etmişdir ki, Azərbaycanın Təbrizdəki konsulu iyulun 15-17-də İran tərəfi, o cümlədən Şərqi Azərbaycan vilayətinin ostandarı ilə bir neçə görüş keçirmişdir. Görüşlər nəticəsində İranda saxlanılan azərbaycanlı şairlərin qohumları ilə görüşünə icazə verilməsi barədə razılıq əldə olunmuşdur.
"Hazırda görüşün detalları razılaşdırılır. Əsas odur ki, biz vətəndaşlarımızın öz qohumları ilə görüşünə razılıq ala bilmişik. Biz bu məsələni diqqətdə saxlamaqda davam edirik. İran tərəfi hələ də bizə vətəndaşlarımızın saxlanmasının səbəblərini rəsmi şəkildə açıqlamamışdır", - deyə E.Abdullayev əlavə etmişdir.