Şərqi Avropada Təhsil Alan Azərbaycanlı Tələbə və Məzunlar (EEASA) İctimai Birliyi Azərbaycan Respublikasının Prezidenti yanında Strateji Araşdırmalar Mərkəzində "Şərqi Avropa-Azərbaycan: etibarlı tərəfdaşlığın, elmi əməkdaşlığın perspektivləri və mədəni dialoq" mövzusunda elmi seminar təşkil etmişdir.
EEASA-dan bildirmişlər ki, seminarda SAM-ın direktoru Fərhad Məmmədov, bir sıra Şərqi Avropa və Asiya universitetlərinin rəhbərləri, diplomatik korpusun nümayəndələri, Azərbaycanın müvafiq QHT-lərinin təmsilçiləri, tələbələr və məzunlar iştirak etmişlər.
Seminarı Şərqi Avropada Təhsil Alan Azərbaycanlı Tələbə və Məzunlar İctimai Birliyinin (EEASA) təsisçisi Kamal Axundov açaraq tədbirin məqsədləri barədə məlumat vermişdir.
SAM-ın direktoru Fərhad Məmmədov son illərdə Azərbaycanda əldə olunan inkişafdan danışmışdır. Ölkəmizdə gənclər üçün yaradılan imkanları xüsusi vurğulayan SAM-ın direktoru seminarın işinə uğurlar arzulamışdır.
Tədbirdə Minsk İdarəetmə İnstitutunun, Kiyev İqtisadiyyat və Hüquq Universitetinin, Malayziya Limkokvinq Universitetinin, Belarus Dövlət Universitetinin rəhbər və təmsilçiləri və EEASA-nın baş katibi Tural Hümbətov müzakirə olunan mövzu İlə bağlı fikirlərini bölüşmüşlər.