İyulun 3-də Azərbaycan Respublikasının müdafiə naziri, general-polkovnik Səfər Əbiyev Kolumbiya Respublikası Senatının ikinci konstitusional komitəsinin sədri xanım Alexandra Moreno Pirakivenin başçılıq etdiyi nümayəndə heyəti ilə görüşmüşdür.

Müdafiə Nazirliyinin mətbuat xidmətindən bildirmişlər ki, qonaqları salamlayan müdafiə naziri Kolumbiya parlamenti üzvlərinin Azərbaycana səfərinin böyük əhəmiyyət daşıdığını və ölkələr arasında ikitərəfli əlaqələrin genişlənməsinə xidmət etdiyini vurğulamışdır. Azərbaycan ərazilərinin Ermənistan tərəfindən işğalı barədə qəbul etdiyi qərara görə Kolumbiya Senatının üzvlərinə öz təşəkkürünü bildirən nazir Səfər Əbiyev bölgədə mövcud hərbi-siyasi vəziyyət və onun yaratdığı ağır problemlər barədə də qonaqları məlumatlandırmışdır.

Müdafiə naziri görüş zamanı hər iki ölkə arasında hərbi əməkdaşlıq məsələlərinin vacibliyini önə çəkmişdir.