Polşanın rəsmi orqanları Azərbaycanın bu ölkədəki səfirliyinə müraciət edərək 20 fərdi şəxsin diplomatik missiya qarşısında aksiya keçirmək istədiyi barədə məlumat verib.
Səfirlikdən APA-ya verilən məlumata görə, nümayiş keçirəcək şəxslərin kimliyi, hansı təşkilata mənsubluğu və hansı tarixi ədalətsizlikdən danışmaq fikrində olduqları səfirliyə məlum olmayıb: "Lakin zəmanəmizin ən aktual ədalətsizliyinin - Ermənistan tərəfindən Azərbaycan torpaqlarının zəbt olunması və Xocalı soyqırımının dünya ictimaiyyəti tərəfindən lazımınca dəyərləndirilməməsi səbəbindən səfirlik məhz bu mövzularda müvafiq hazırlıq işləri aparıb. 10-12 nəfərdən ibarət bir qrup erməni səfirliyin qarşısında nümayiş keçirməyə cəhd edərkən səfirliyin binasına yaxınlaşanda hasardan asılmış və Ermənistan təcavüzünü, Xocalı soyqırımını əks etdirən fotoşəkillərlə qarşılaşıblar".
Məlumata əsasən, 10-12 erməni aksiya keçirməyə cəhd etsə də, onların cəhdləri uğursuzluğa düçar olub. "Manifestasiya" adlandırılan və 30 dəqiqə müddətində planlaşdırılan tədbir, 10 dəqiqə gec başlayıb və heç bir ciddi nəticə vermədən başa çatıb.